08 Agosto 2023, Ankara, Türkiye – Ipinagdiwang ng Pasuguang ng Pilipinas at Sentro Rizal sa Ankara ang Buwan ng Wika na may temang “Filipino at mga Katutubong Wika: Wika ng Kapayapaan, Seguridad, at Ingklusibong Pagpapatupad ng Katarungang Panlipunan," sa pamamagitan ng isang palatuntunan para sa mga kabataang Pilipino sa Ankara kasama ang kanilang mga magulang, noong ika-4 ng Agosto 2023. Ang labing-apat (14) na kalahok ay kinabibilangan ng mga anak ng mga nagtatrabaho sa Pasuguan at mga batang Pilipino-Turkish na biktima ng nakaraang lindol sa Hatay, Türkiye, at ngayon ay naninirahan na sa Ankara. Ang mga batang kalahok na Pilipino-Turkish ay hindi nakakaintindi at nakakapagsalita ng Wikang Filipino.

Iba’t ibang aktibidad ang inihanda para sa mga bata kabilang na ang pagtuturo ng mga simpleng salita at pangungusap sa Wikang Filipino sa pamamagitan ng pagpapakilala sa sarili, pagpapalawak ng mga salitang Filipino, at pagbabasa ng kwentong “Ang Matsing at ang Pagong” na sinulat at ginuhit ni Dr. Jose. Rizal at na isinalin sa Filipino ni Eleanor Hechanova. Itong mga aktibidad na to ay ginanap sa silid-aklatan sa Sentro Rizal Ankara.

Si Chargé d’Affaires a.i. Juan E. Dayang Jr. sa kanyang talumpati sa programa ng Buwan ng Wika. (Embassy photo)

Sa kanyang talumpati, hinimok ni Chargé d’Affaires a.i. Juan E. Dayang Jr. ang lahat ng mga kalahok na patuloy na mahalin ang Wikang Pambansa na nagbubuklod sa lahat ng Pilipino. “Ang Wikang Filipino ay tanda ng pagkakaisa ng bawat Pilipino patungo sa kapayapaan,” aniya.

Si Erhan Solmaz at Selena Taș, na kapwa Pilipino-Turkish, ay nagpapakilala ng kanilang mga sarili gamit ang Wikang Filipino. (Embassy Photo)

Ang mga batang kalahok ay tahimik na nakikinig sa kwento ng “Ang Matsing at ang Pagong” na binabasa ni Chargé d’Affaires a.i. Juan E. Dayang Jr.  at binibigkas sa Wikang Türkiye ng tagasalin ng Pasuguan. (Embassy Photo)

Pagkatapos ng palatuntunan sa Sentro Rizal, nagtungo naman ang mga bata sa Consular Section para sa pagtatampok ng mga larong Pinoy katulad ng piko, sungka at tumbang preso na masayang sinalihan ng mga bata. Ang programang ito ay para ipakilala sa mga kabataang Pilipino ang mga kinasanayang larong pambata sa Pilipinas noong panahon na hindi pa uso ang mga gadyet at internet. Ipinakilala din sa mga bata ang Pinoy Dyipni na isang simbolo ng kulturang Pilipino, sa pamamagitan ng paggawa at pagkulay ng dyipni na gawa sa papel.

Masayang naglalaro ng sungka at piko ang mga batang kalahok. Gumawa at nagkulay din sila ng dyipni na gawa sa papel. (Embassy photo).

Pagkatapos ng programa isang simpleng merienda ng pancit, kutsinta, puto at hopia ang pinagsaluhan ng mga bisita.

Si Chargé d’Affaires a.i. Juan E. Dayang Jr. kasama ang mga kawani ng Pasuguan, mga batang kalahok at kanilang mga magulang, pagkatapos ng programa para sa Buwan ng Wika (Embassy photo)

Sa pagpapatuloy ng pagdiriwang ng Buwan ng Wika, ang Pasuguan ng Pilipinas at Sentro Rizal sa Ankara kasama ang Konsulado Heneral ng Pilipinas sa Istanbul, sa pakikipagtulungan ng National Commission for Culture and the Arts, ay magsasagawa ng isang online lecture-workshop na pinamagatang “Kilalanin ang Wikang Filipino sa Dalawampu’t Walong Salita” sa ika-20 ng Agosto 2023, Linggo, 1:00 – 4:00 ng hapon.  Sa mga nais lumahok, maari kayong magpalista sa pamamagitan ng link bit.ly/akpewika 

TAPOS.